Bernd Lucke

De Wikipedia
Bernd Lucke in li annu 2013

Bernd Lucke es un politico e economist de Germania. Il es li fundator del partise Alternative por Germania, quel es criticaci contra li comun europan valuta Euro. Lucke esset un del tri parlatores del partise e esset un del tri co-presidentes inter 2013 e li 4-im de julí 2015 quande il perdit li election al presidente del partise contra Frauke Petry.

Bernd Lucke nascet li 19 august 1962 in Berlin. Inter 1982 e 1984 il studiat economie, filosofie e nov historie in li universitá de Bonn. Il continuat su studies in li annus 1984 e 1985 per un stipendie in li Universitá de California in Berkeley in li federal state California in li Unit States de America. Pos que in comensat laborar in diversi universitás in Germania. Hodie il es professor de macro-economie in li universitá de Hamburg.

Lucke esset inter 1978 e 2011 un membre del crist-democratic Cristan Democratic Union de Germania (CDU), ma ne havet alquel functiones in li partise. Lucke esset criticaci contra li politico de CDU por li salvation del comun europan valuta Euro e pro to il forlassat in li decembre 2011 li Cristan Democratic Union.

In li april 2013 il fundat con altri persones li partise Alternative por Germania, quel es criticaci contra li Euro e partiprendet in li electiones federal de Germania in li septembre 2013. It recive 4,7 percent e dessuccesset intrar in li federal parlament.

Por li electiones al Europan Parlament in li may 2014 Bernd Lucke esset sur li prim position del liste del Alternative por Germania e esset electet in li Europan Parlament.

In li comense del annu 2015 Lucke fundat li asociation Weckruf 2015 in quel il colectet moderat membres del partises Alternative por Germania. Il advertit de dextri e populist tendenties in li partise. Lucke perdit in li electiones del presidente del partise Alternative por Germania sur li partise-congress in Essen li 4-im de julí 2015 contra li exponente del national-conservativ fraction Frauke Petry con 38 percentes. Li 8-im de julí 2015 il declarat su intention abandonar li partise Alternative por Germania e forlassat li partise oficialmen li 9-im de julí 2015.

Li 19-im de julí 2015 Bernd Lucke fundat li partise Alliantie por Progresse e Departe e esset electet quam presidente de ti liberal-conservativ political partise.

Bernd Lucke es maritat e have quin infantes.