Thomas Edmondson

Thomas Edmondson (30 junio 1792 in Lancaster, Anglia – 22 junio 1851 in Manchester, Anglia) es li inventor del Edmondson ferrovia-billete. Quande il comensat laborar quam chef de station in Milton (plu tarde Brampton) por li relvia de Newcastle e Carlisle, li idé venit a il simplificar li processu far li passageros montar li tren, quel til tande esset totalmen scrit per li manu.

Citation ex Cosmoglotta pri Thomas Edmondson:

Li invention del billet de ferrovia es debit a Thomas Edmonson, nascet ante circa 150 annus. Il esset *chef de station* proxim Carlisle, in Anglia; ma in li etá heroic del ferrovia, li viageatores esset atraet tre numerosi per li novitá, e li station-chef, sol employate, esset anc agulliero, portator e garda-barriere. Li viageatores venit solmen poc témpor ante li passage del tren e, pro que on devet scrir per li manu chascun « bon » de transporte, li convoy devet sovente atender long.

Edmonson successat eliminar ti retardes preparante in antey billetes: in inventet un specie de scri-machine de quel li incrat bande printat sur paperin quadrates li loc del destination, li classe, li numeró del sede in li vagon e li date de emission del billet. Restat a scrir per li manu li custa del curse. Il submisset su invention a su directores, quel ridiculisat su procede e támen permisset li « amusar se far billetes », si solmen il ne molestat per it ni li direction ni li publica.

Ne considerante se quam victet, Edmonson ofertat su invention a un altri ferroviari companie quel adoptet it e prendet li inventor in su servicie, duplicante su salarie. Poy altri companies sequet li exemple e Edmonson fundat con su fratre un societé por furnir al ferrovias machines e billetes tot printat.

Quande Edmonson morit in 1851, it restat in Anglia solmen un o du stationes quel fat ancor billetes per li manu.