Afere de Wells e Wellington

Li Afere de Wells e Wellington es li nómine dat al evenimentes circum li publication de tri paperes de resercha in li Australian Journal of Herpetology in 1983 e 1985. On etablisset li jurnale in 1981 quam un publication revuat per pares sur li studie de amfibies e reptiles. On publicat li prim du numerós sub editor Richard W. Wells, un studente del unesim annu in biologie che li Universitá de New England in Australia. Poy Wells cessat comunicar con li redaction del jurnale por du annus, poy subitmen publicat li jurnale sin revúe per pares in 1983 e 1985. Con se self e docente de liceo C. Ross Wellington quam co-autores, li paperes reorganizat li tot taxonomie del amfibies e reptiles in Australia e Nov-Zeland e proposit plu quam 700 changes al binomial nomenclatura del herpetofauna del region.

Li membres del comunité herpetologic monstrat un fort reaction contra li actiones de ti du, e in fine successat in un processu in li International Commission pri Zoologic Nomenclatura por supresser li nómines proposit de ili. Poy sequet quar annus de argumentation, pos quel li comission decidet ne votar sur li casu, pro que it actet se por li pluparte pri argumentes taxonomic e ne nomenclatural; alcun nómines de Wells e Wellington restat talmen íntuchat. Li casu monstrat li vulnerabilitá al etablisset regules de nomenclatura biologic, e mem in 2020, 24 del specific nómines assignat de Wells e Wellington resta valid senior sinonimes.