Bernhard Lichtenberg

Bernhard Lichtenberg (1875 - 1943) esset un prestro catolic german qui resistet contra li regime National Socialist (a saver, li regime nazi).

Lichtenberg nascet li 3 decembre 1875 a Ohlau in Silesia prussic (nu Oława in Polonia), u su patre esset buticario. Il esset ordinat quam prestro in 1899 e in 1900 misset a Berlin. Quam prestre parocial il esset anc membro activ del Centre-Partise catolic. Ja in 1930 Joseph Goebbels denunciat le. In 1930 il esset nominat quam canonico del catedrale de Santa Hedwig e in 1938 quam prevoste (Dompropst). Pos li Kristallnacht-pogromes de novembre 1938 il comensat pregar publicmen chascun soledí por omni persones, de quocunc confession, persecutet del Nazis. In 1941 il protestat contra li mortation sytematic de malades insanabil e de desvalidates per li euthanasia-programma del regime.

In octobre 1941 il esset denunciat, li 23 octobre arestat del Gestapo e li 22 may 1942 condamnat al cárcere. Li 3 novembre 1943 il esset enviat per tren al concentration-camp Dachau. Durante un halta a Hof, támen, su sanitá, ja debil, se apejorat, e per consequentie il esset admisset al hospitale del borgo, u il morit li 5 novembre.

Li tombe de Bernhard Lichtenberg es in li catedrale de Santa Hedwig a Berlin. Li 23 junio 1996 li pápa Joannes Paulus II le beatificat. Su die memorial es li 5 novembre. Li loc memorial israeli Yad Vashem le ha nominat quam "Vertuosi del Nationes".

Bibliografie

• Ludger Stühlmeyer: Gerechter unter den Völkern. Vesper zu Ehren des seligen Bernhard Lichtenberg. Mit einer Biografie und Zitaten. Geleitwort von Nuntius Eterovic. Verlag Sankt Michaelsbund, München 2017, ISBN 978-3-943135-90-9.
• Barbara Stühlmeyer, Ludger Stühlmeyer: Bernhard Lichtenberg. Ich werde meinem Gewissen folgen. Topos plus Verlagsgemeinschaft, Kevelaer 2013, ISBN 978-3-8367-0835-7.
• Gotthard Klein: Seliger Bernhard Lichtenberg. Regensburg 1997.
• Erich Kock: Er widerstand. Bernhard Lichtenberg. Dompropst bei St. Hedwig. Berlin 1996.
• Otto Ogiermann SJ: Bis zum letzten Atemzug. Das Leben und Aufbegehren des Priesters Bernhard Lichtenberg. Leipzig 1985.