Jakob Finci
Jakob Finci es un diplomat e representante del judeós in Bosnia e Herzegovina. Il nascet in li 1-im octobre 1943 in li camp de concentration in Rab (Croatia) e es li actual ambassador de Bosnia e Herzegovina in Svissia.
Personal e professional vive
[modificar | redacter fonte]Jakob Finci, quel nascet in un camp de concentration in li annu 1943, supervivet quam infante li holocaust. Pos har finit li scole il studiat jurisprudentie in Sarajevo. Finci laborat quam avocate e esset specialisat a international jure de comercie.
Inter 1983 e 1990 Finci esset director del bob-slitte-curse de Sarajevo quel esset constructet por li Olimpic Ludes del hiverne 1984 in Sarajevo.
In li annu 1991 il esset un del initiatores del judeic cultural organisation La Benevolencija. Durant li Guerre Intern de Bosnia e Herzegovina La Benevolencija organisat transportes con humanitari auxilie quam medicamentes e victuales al assediat Sarajevo. E anc in ti transportes 2500 homes de omni national gruppes posset forlassar li assediat cité.
In li annu 1995 Jakob Finci esset electet quam presidente del Judeic Societá de Bosnia e Herzegovina. Il es vice-presidente del association FONDEKO e membre in li ne-guvernamental organisation Krug 99. De 2000 til 2008 Finci esset li unesim director del Agentie por li Statal Servicie.
In li annu 2008 Jakob Finci devenit ambassador de Bosnia e Herzegovina in Svissia.
Li casu Sejdić-Finci
[modificar | redacter fonte]In li annu 2006 il processuat juntmen con li Roma-activist Dervo Sejdić in li Europan Tribunale de Homan Jures in Strasbourg (Francia) contra un articul in li constitution de Bosnia e Herzegovina quel ne permisset cives qui ne es membres del national gruppes de croates, serbes o bosniakes candidar por li Dom del Nationes de Bosnia e Herzegovina, quel es li duesim dom del parlament del land, por li Statal Presidentie de Bosnia e Herzegovina.
In li annu 2009 li Europan Tribunale de Homan Jures decidat que li articules in li constitution de Bosnia e Herzegovina es contrari li Europan Convention pri Homan Jures. Quam membre del Consilie de Europa Bosnia e Herzegovina have li obligation changear su constitution pro to membres de altri national gruppes posse candidar por Dom del Nationes de Bosnia e Herzegovina e Statal Presidentie de Bosnia e Herzegovina. Til hodie Bosnia e Herzegovina ne ha changeat su constitution.