Karl Janotta

Articules unesim scrit in occidental
De Wikipedia

Karl Janotta
Land Imperie Austro-Hungar, poy Austria
Nascentie 15 may 1880
in Vienna (Austria)
Morte 1966
Ocupation Politico e escritor

Karl Janotta esset un occidentaliste austrian.

Biografie[modificar | redacter fonte]

Il nascet li 15 may 1880 in Vienna (Austria) quam unesim filio del professor August Janotta. Il frequentat li gimnasie Theresian (Theresianum), un fundation del imperatressa Maria Theresia (1717 - 1780) quel in general esset apert solmen a yun nobiles.

Malgré ti milieu, Janotta devenit socialist ja durant li témpor gimnasial per li letura del roman de future de Eduard Bellamy "Retrospection al annu 2000". Pos li prim guerre mundal il devenit borgomastre in Kaltenleutgeben, proxim Vienna.

Ultra per socialisme il esset ocupat per li combatte contra li ebrietá e per li question del IAL a quel il dedicat mult témpor de su vive.

Il raconta pri to in su "Autobiographiette Interlinguistic":

Quam gimnasiast yo comensat studiar Volapük in 1896 o 1897. Ma secun li consilie de mi patre, quel judicat ti lingue quam ínapt por li scop visat, yo cessat aprender e propagar Volapük. In 1905, essente in Zürich, yo fat conossentie de Esperanto e participat quam raportero del "Neue Zürcher Zeitung" in 1906 in Genève al duesim Congress International de Esperanto, durant quel yo ha esset presentat a Dr. Samenhof. In 1907, essente in Karlsruhe, yo intrat in relationes corespondent con Couturat e devenit un del unesim Idistes.
In 1921 yo arangeat con Pigal, Moess e Quint li "Unesim International Congress de Ido" in Wien. In 1923 yo assistet li Duesim Congress International de Ido in Dessau (Germania) e esset electet quam presidente del congress.
In 1923 Pigal convertet me ad Occidental e acceptat me quam colaborator por li fundation del Occidental-Union e de su Central Oficie in Mauer apu Vienne. Ingeniero Hans Hoerbiger, li internationalmen conosset autor del Cosmogonie Glacial, devenit li Presidente Honorari e Mecen del Occidental-Union, Pigal devenit li director del Central Oficie e yo li secretario del sam institution. Li metodes purmen scientific e democratic, queles noi aplicat in li organisation del movement del interlingue Occidental, havet li efecte, que li Union progresset rapidmen, e que scientistes de fama international adheret al Union.

Completante ti dates interlinguistic noi cita su colaboration a OdW (Repetitorie del grammatica). Poy il publicat un litt manuale de Occidental in li editoria Frankh (Stuttgart). In ultra il scrit su "Complet grammatica", publicat in parte in Cosmoglotta 1929 sq., e mult altri articules interessant.

1936 il esset membre del comité tecnic (ISA 37), in li labores de quel il partiprendet in posto ductent.

Ho-moment il es composient un "Lexico de Interlinguistica", profitant del grand chance posser utilisar li imens biblioteca interlinguistic de Dr. Ing. Eugen Wüster in Wieselburg (Austria).

Ovres[modificar | redacter fonte]

In ido[modificar | redacter fonte]

  • Wörterbuch Ido-Deutsch Linguo internaciona di la delegitaro (sistemo ido)
  • Ido, die Weltsprache der Zukunft : systematische Grammatik nebst Lesestücken und Wurzelverzeichnis
  • Linguo internaciona di la delegitaro Ido die Weltsprache der Zukunft ; systematische Grammatik nebst Lesestücken und Wurzelverzeichnis
  • Traduction de La libro del 100 marveli by Artur Fürst

In occidental[modificar | redacter fonte]

  • Occidental Die Weltsprache ; Einführg samt Lehrkursus, Lesestücken, Häufigkeitswörterverzeichnis u. a. Beiträge
  • Leitfaden der Weltsprache Occidental
  • Interlinguist Julius Lott
  • Leitfaden der Weltsprache Occidental ; Lehrgang in 7 Kapiteln, Lesestücke und ausführliches Wörterverzeichnis Occidental-Deutsch. Mit einem Bilde des Schöpfers der Occidentalsprache
  • Repetitorie del grammatica
  • Litt manuale de Occidental
  • Complet grammatica
Ti-ci article usa contenete del magazine Cosmoglotta, numeró Cosmoglotta A 156 (sep 1950)