Pomakes

De Wikipedia
Saltar a: navigation, serchar
Region de pomakes (verdi) in Bulgaria

Li pomakes (bulgaric Помаци /Pomatsi/, grec Πομάκοι /Pomakoi/, turk Pomaklar) o musulman-bulgares (bulgaric българи мюсюлмани /balgari miusiulmani/), anc localmen connosset quam Akhriani (bulgaric Ахряни) es un slavic pópulation islamisat del region del Rhodopes e alquel villages circum Teteven in li region central del Montes Balcan. Lor origines es obscur, ma on generalmen crede, que ili es bulgares, quel ha convertet se a islam durant li periode del ottoman predominantie in li Penínsul Balkanic. Li término posse anc esser usat per ocasion por referer pri li torbeshes - slavic musulmanes in li República de Macedonia. Li total pópulation del pomakes es circum 800 000 e ili reside precipue in Bulgaria (150 000 - 200 000), ma presenties relevant existe anc in Grecia (30 000 - 35 000), Turkia (600 000) e li República de Macedonia. Ili parla dialectes diversi del lingue bulgaric, o li turk lingue.

Etymologies[modificar | redacter fonte]

Li origine del término "pomak" ne es cert. Secun li bulgaric scientistes, li término vell posser esset derivat o del parol bulgaric помагач /pomagach/, significant "auxilitor" (li interpretation maxim acceptat) - to refere pri lor rol quam truppes auxiliari in li armé ottoman; o de помохамеданчени /pomokhamedancheni/ - to significa "islamisat". Akhriani, un nómine quel li pomakes ha unquande usat por les self, vell posser originar del parol Agariani in li lingua ancian slavic ecclesiástic, significant "atheistes", ma it vell anc posser esset derivat del Ahi, fratres islamic parareligiosi, quel ha esset tre diffuset in li Rhodopes in li period ottoman, quam li scientist bulgaric Anastas Ishirkov supposi. Altri versiones ancor deriva it de по мъка /po maka/, significant "per martyrie" e referent pri un violent conversion presumptiv a islam; o de потурняк /poturniak/, litteralmen "alquí fat un turk". Null ex ti ci du etymologies es versimil.

Alcunc grec scientistes asserte, que pomak origina in li grec parol πομαξ /pomax/, significant "trincard"; ti ci opinion basa se sur li hábitu de thraces ancian mult trincar. On anc crede, que Akhriani vell esser derivat del nómine de un presumptivmen thrac tribe de agrianes.

Conversion a islam[modificar | redacter fonte]

On save poc certmen pri li conversion del pomakes a islam. It sembla, que it ha esset gradual e que it ha occurret en periodes different. Li prim contactes de islam con li balkan nationes es rapportat in li 7im e 8im sécules, benque on ne save certmen, ca alcun pomakes ha convertet se a islam tande. Li prim conversiones numerari ha occurret in li duesim demí del 14im sécul, quande li ottomanes ha conquestat Bulgaria. It es rapportat, que mult possessores de suol ha convertet se por continuar in li possession de su suol. Altri conversiones ha occurret sub li sultane Selim II (1512-20), ma li 17im sécul ha esset maxim important, quande presc li tot pópulation del Rhodopes ha convertet se al crede islamic. Li númere de pomakes ha ancor augmentat durant li 18im sécul; li últim periode de conversiones in li Penínsul Balkanic ha occurret in li comense del 19im sécul.

Ligamentes extern[modificar | redacter fonte]