Alphonse Matejka

De Wikipedia
Saltar por navigation Saltar por sercha
Alphonse Matejka
Land Svissia
Nascentie 9. januar 1902
in St. Gallen, Svissia
Morte 27. octobre 1999
in La Chaux-de-Fonds, Svissia
Ocupation

Alphonse Matejka (* 9. januar 1902 in St. Gallen Svissia; † 27. octobre 1999 in La Chaux-de-Fonds Svissia) esset un famós Occidentalist de tchek origine. [1]

Li familie Matejka esset originalmen de Wischkovitz, Bohemia (secun un oficial document redactet in lingue german). Li patre de Alphonse Matejka arivat in Svissia ante 1900, forsan pro manca de labor in Tchekia, e devenit Sviss cive in 1915. Su filio Alphonse nascet in St. Gallen, Svissia, li 9.1.1902. Il passat su ultim annus de scolero quam studiant in li section mercantil del scola cantonal u il fundat un florescent studiantic union sub li nómine Industria Sangallensis quel existe til nor dies.

In li comensa del secul passat, St. Gallen esset li capitalia international del broderíes, e li conossentie de foren lingues esset un conditionprimordial e in sam témpor li garantie por un atractiv professional carriere. Pos su formation teoric, li yun hom entrat dunc in li burós de un internationalmen conosset firma de broderíes, Reichenbach & Co., u esset altmen estimat su extraordinari linguistic talentes. It esset solmen logic que li intelligent e mult promessent yun mann esset bentost transferet vers li filiale de Paris.

Il usat li témpor e continuat su formation lingual frequentant cursus de véspere. Il aprendet e mastrisat perfectmen li romanic quam li scandinavic lingues e mem tam exotic lingues quam li Suaeli. Durant un cert témpor il scrit mem articules por un jurnal in russ lingue e fat traductiones por li russ Academie del Scienties.

Ultra li studies il ne neglectet li agreabil partes del vive e explorat intensivmen li cité de Paris quel il conosset in curt témpor quam su propri tasca de pantalon. It arivat que in li cité del amor il incontrat anc li grand amor de su vive, Jeanne Bellanger, e li felici cuple maritat se in Paris li 26.7.1928. On ne save plu quande e pro quo ili translocat a Zúrich in li annus 30. Desde li annu 1936, ili vivet a Amsterdam, por finalmen trovar un definitiv domicilie in La Chaux-de-Fonds, Svissia, u Alphonse Matejka esset ingageat in li internationalmen orientat sviss industrie del horlogeríe.

Pensar que un extraordinari linguistic genio de su calibre vivet plu o minu claustrat in su propri munde de libres e de studies vell esser un fals idé pri Alphonse Matejka qui esset in contrari conosset por su sicc humor. Unvez, il retomat a St. Gallen con su marita Jeanne por un convenida con li old amicos del studiantic témpor. In ti circul, il fat un presentation de quel Jeanne ne comprendet un sol parol; ma ella racontat que li sala ridet in un maniere que ella ne hat jamá audit.

Alphonse Metejka esset activ in li movement de Ido, ma transeat in li annu 1937 al movement de Occidental.

In 1942 il publicat li unesim edition del manuale OCCIDENTAL die internationale Welthilfssprache, secuet in 1945 per li lexico Wörterbuch Occidental-Deutsch e Deutsch-Occidental, sur li base del precedent ovres de Joseph Gär, Tallinn, e Prof. Ric Berger, Morges. Posquam Occidental esset rebaptisat Interlingue in 1949 Alphonse Matejka redactet e actualisat li edition del libre Interlingue die natürliche Welthilfssprache, für Millionen geschaffen, von Millionen verstanden. Vollständiger Lehrgang in 20 Lektionen por german parlant studentes.

Il esset li mult-annual e meritosi redactor de Cosmoglotta, li official organ del Interlingue-Union.

Referenties[modificar | redacter fonte]

  1. Alphonse Matejka 1902—1999, Cosmoglotta 289, Estive 2000
Ti-ci article usa contenete del magazine Cosmoglotta, numeró 289