Cornwall

De Wikipedia
Jump to navigation Jump to search
Portu de St Ives, west Cornwall

Cornwall es li comtía al extremitá sud-west de Anglia. It es bornat per li Mare Celtic al nord, li Marstrette Anglesi al sud e li comtía Devon al west. Li fluvie Tamar marca lu max del frontiera inter Cornwall e Devon. Li extremitá west del chef terra de Cornwall, Land's End, es anc li punctu max west del chef terra anglesi. Lizard Point in Cornwall es li punctu max sud del chef terra de Grand-Britania. Li Scilly-insules, 45 km sud-west de Land's End, fa parte del comtiá ceremonial de Cornwall ma have un administration separat. Li insules max sud es li parte max sud de Grand-Britania.

Cornwall have un area de 3.563 km2 e un population de 536.000 (2014, est.). Li cité administrativ es Truro.

Cornesi, un lingue celtic, esset parlat per omni Cornwall til c. 1100. Desde tande it esset poc a poc remplazzat de anglesi, e til 1800 it esset practicmen extint. It supervive in li nómines de loc, e desde li tost 20esim secul vi un movement por reviver li lingue. Vi nu pluri milles de gente qui comprende alquó del lingue.

Li declina del industries traditional, ante omnicos li miniera del stanno e li pisciera, ha fat de Cornwall un del regiones max povere del Reyatu Unit. Li economía depende nu precipue del turisme. Turistes es atirat per li clima clement, per li plages excellent e per li bellitá del paisage e del old piscator-villages e -citelles.