Filosofie

De Wikipedia
Saltar por navigation Saltar por sercha
Platon e Aristoteles, detallie de Li scol de Athina, pictura de Rafael Sanzio.

Li filosofie (fro li grec φιλοσοφία, philosophia, "amor de saventie") es un discipline scientific quel studia qualmen on deve viver e queles es li principies del rason e del conossentie.

Questiones filosofic classic include: "Es it possibil conosser omnicos?" e, si it es possibil, "Esque on posse demonstrar it?". Li filosofes posi anc questiones plu practic e concret quam "Esque hay un optim form de viver?".

Historicmen, li filosofie ha includet omni formes de conossentie. Desde li ancian filosof grec Aristoteles til li 19esim secul , li "filosofie natural" includet astronomie, medicina, e fisica. Per exemple, li libre de Newton Principies matematic de filosofie natural (publicat in 1687) esset classificat plu tarde quam un libre de fisica.

In li 19esim secul, li crescentie de universitás modern de resercha fat que li filosofie academic devenit plu specialisat e professionalisat. In li epoca modern, alcun reserchas quel esset traditionalmen parte del filosofie ha devenit disciplines academic índependent, includente psicologie, sociologie, linguistica e economie. Altri reserchas relatet con arte, scientie, politica e altri occupationes remanet parte de filosofie. Por exemple, "es bellitá subjectiv o objectiv?"

Li subcampes principal del filosofie academic include metafisica, quel es concernet con li natura fundamental del existentie e li realitá; epistemologie, quel studia li natura del conossentie e credentie; etica, quel es concernet con valores moral; e logica, quel studia li regulas de inferentie queles permette deducter conclusiones ex premisses ver. Altri subcampes notabil include li filosofie del scientie, filosofie politic, estetica, filosofie del lingue e filosofie del mente.

Historie[modificar | redacter fonte]

In un sensu general, li filosofie es associat con sagiesse, cultur intellectual e li sercha de conossentie. In ti-ci sensu, omni cultures e societás literari fa demandas filosofic, quam "qualmen on deve viver?" e "quel es li natur del realitá?". Un ampli e ínpartal conception de filosofie, dunc, trova un inqueste rasonat in tali temes quam realitá, moralitá, e li vive in omni mundal civilisationes.

Filosofie occidental[modificar | redacter fonte]

Statue de Aristoteles (384-322 a.C.), un figur principal del filosofie grec ancian, in li Parc de Aristoteles, in Stagira.

Li filosofie occidental es li tradition filosofic del munde occidental, quel data del pensatores presocratic qui esset activ in li 6esim secul a.C. in Grecia, quam Thales (c. 624 - c- 545 a.C.) e Pitagoras (c. 570 a.C. - c. 495 a.C.) qui practicat li "amor del sagesse" (latin: philosophia) e esset anc nominat "studantes del natur" (physiologoi).

Li filosofie occidental posse esser dividet in tri eras:

  • Ancian (greco-roman).
  • Medieval (referet al pensament european cristian).
  • Modern (comensante in li 17esim secul.

Antiquitá[modificar | redacter fonte]

Durante que nor conossentie del Antiquitá comensa con Tales in li 6esim secul a.C., mult litt es conosset pri li filosofos avan Socrates (comunmen conosset quam presocraticos). Li Antiquitá esset dominat del scoles filosofic grec. Li max notabil scol influet del instructiones de Socrates esset ti de Platon, qui fundat li Academia Platonic, e su studante Aristoteles, qui fundat li Scol Peripatetic. Altri traditiones filosofic ancian influet de Socrates include li cinisme, li cirenaicisme, li stoicisme e li skepticisme academic. Altri du traditiones esset influet del contemporanee de Socrates, Democrito: pironisme e epicureanisme. Temes important tractat del grecos esset li metafisica (con teories rival quam li atomisme e li monisme), cosmologie, li natur de un vive bonvivet (eudaimonia), li possibilitá de conossentie, e li natur del rason (logos). Con li ascension del Imperie Roman, li filosofie grec esset plu discusset in latin del romanos quam Ciceron e Seneca.

Branches de filosofie[modificar | redacter fonte]

Li questiones filosofic posse esser gruppat in pluri branches. Ti gruppes permisse li filosofos focar se in un colection de temes simil e interacter con altri pensatores qui es interessat in li sam questiones.

Estetica[modificar | redacter fonte]

Li estetica es li "reflexion critica sur arte, cultur e natur".[1][2] It parla pri li natur del arte, li belltá e li predilectiones, li juition, li valores emotional, li perception e li creation e appreciation del belltá[3]. It es plu precismen definit quam li studie de valores sensorial o sensori-emotional, quelcvez judgament de sentiment e preferentie. Su principal divisiones es teorie del arte, teorie literari, teorie de filmes e toerie musical. Un exemple ex li teorie del arte es discerner li colection de principies fundamental in li ovre de un artiste o de un moviment artistic quam li estetica cubiste.

Etica[modificar | redacter fonte]

Li etica, anc conosset quam filosofie moral, studia quel constitue un bon e un mal conducta, valores bon e mal, e lu bon e lu mal. Su

Epistemologie[modificar | redacter fonte]

Li epistemologie es li branche del filosofie quel studie li conossentie. Li epistemologistes examine fontes putativ de conossentie, includente experientie perceptual, rason, memorie, e testimonie. Ili anc investiga questiones pri li natur del veritá, credentie, justification e rationalitá.

Metafisica[modificar | redacter fonte]

Li metafisica es li studie del max general caracteristicas del realitá, quam existentie, témpor, objectes e lor proprietás, lu totalitá e su partes, eventus, processes e causation e li relation inter mente e córpor. Li metafisica include cosmologie, li studie del munde in su totalitá e ontologie, li studie del esser, junt con li filosofie del spatie e li témpor.

Logica[modificar | redacter fonte]

Li logica es li studie de rasonament e argumentation.

Mente e lingue[modificar | redacter fonte]

Li filosofie del lingue explora li natur, orígines, e usation del lingue. Li filosofie del mente explora li natur del mente e su relation con li córpor, quam tipificat per disputes inter materialisme e dualism. In annus recent, ti-ci branche ha devenit relatet con li scientie cognitiv.

Filosofie del scientie[modificar | redacter fonte]

Li filosofie del scientie explora li fundationes, métodes, historie, implicationes e scope del scientie.

Filosofie politic[modificar | redacter fonte]

Li filosofie politic es li studie del guvernament e su relationes del individues (o families e clans) con comunités includente li statu.

Filosofie del religion[modificar | redacter fonte]

Li filosofie del religion tracta li questiones relatet al religion e li idés religiosi ex un perspective filosoficmen neutral.

Metafilosofie[modificar | redacter fonte]

Li metafilosofie explora li scopes, límites e métodes del filosofie. It es debatet ca it es un tema quel veni ante li filosofie o ca ir es un part inherent del filosofie.

Altri subdivisiones[modificar | redacter fonte]

Referenties[modificar | redacter fonte]

  1. Kelly (1998) p. ix
  2. Review Avise:Webarchive de Tom Riedel (Universitá Regis)
  3. Zangwill, Nick. 2019 [2003]. "Aesthetic Judgment Avise:Webarchive" (edition revisat). Stanford Encyclopedia of Philosophy. 9 May 2020.