Frédéric Lagnel
| Frédéric Lagnel | |
|---|---|
| Land | Svissia |
| Nascentie | 20 februar 1901 in Gimel, canton de Vaud |
| Morte | Decembre 1995 |
| Ocupation | Instructor |
Frédéric Lagnel nascet li 20 februar 1901 in li proximité de Gimel, in li sviss canton de Vaud, dunc in li francesi parlant part de Svissia. In su vive, il exercit li profession de un instructor, in prim in Chapelle sur Moudon. Ja in su yun annus il interessat se pri li lingues international: in prim Volapük, poy Ido e Esperanto, por arivar finalmen a Occidental quel esset plu tard nominat Interlingue. Il esset director del Occidental-Union e secretario del SAPO. Desde 1943, e durant li duesim guerre mundial, Lagnel anc esset director del Interimari Academie.
Mersí a Interlingue il mantenet mult contactes e comunicat con numerosi persones de lingues e nationalitá diferent. In un cert punctu de su vive su interesse por Occidental/Interlingue devenit plu strett e il acceptat li secretariatu e li printation del jurnal Cosmoglotta e to til li annus 80. Ti labor de printation esset in li comense realisat manualmen in li presc original maniere de Gutenberg: lettre pos lettre (sistema Roneo), poy, in su revolutionari passu de modernisation, per tippar li articules directmen sur matricie (sistema Print-Fix) con li scri-machine, e finalmen per usar li policopiator-aparate (Gestetner). Durant li noctes, li instructor transformat se in un experte de printería e mastrisat un íncessant serie de innovationes in li developament del tecnic scene del printation.
In 1948 il translocat se a Cheseaux, un litt village in li proximité de Laussane, situat sur li rives del lago Leman, u il terminat su cariere de instructor in 1960. Maritat in 1926, il havet du filios e un filia e nin nepotes. Il morit in decembre 1995, e su marita sequet le pos poc dies.
Referenties[modificar | redacter fonte]
| Ti-ci article usa contenete del magazine Cosmoglotta, numeró 291 |
|---|