Interlingue

Interlingue
Creator	Edgar von Wahl
Classification	lingue artifical   lingue auxiliari international    Interlingue
Organisation	Interlingue-Union
Lingue code
ISO 639-1	ie

Interlingue o Occidental es un Lingue International creat de Edgar von Wahl in 1922. It es immediatmen comprensibil a mult hom occidental, pro to usabil por mult relationes anc con poc studie anterior. Anuncias e reclames e scientic articules in Occidental es comprensibil a milliones de Europanes, Americanes, e Sud-Americanes. Un del grand avantagies de Interlingue es que on posse derivar regularmen milles de paroles international.

Desde 1949 Occidental have li nómine Interlingue.

Historie

Interlingue es un Lingue International, quel es iniciat del baltogermano Edgar von Wahl. Il presentat su projecte in 1922 in un litt revúe, quel il intitulat «Kosmoglott» e self editet in Reval, hodie Tallinn (Estonia).

«Kosmoglott» durant sett annus esset apert por omni critica del nov lingue e ofertat un forum anc por altri projectes. Ma in 1929 on constatat, que li nov lingue esset tant exprovat in li usa practical e tant afirmat, que on redactet li revúe solmen in ti lingue e per to dat it un propri forum. Li nómine del revúe esset adaptat al ortografie international; nu it esset nominat «Cosmoglotta».

Wahl nominat su lingue «Occidental», proque li international vocabularium presc solmen provenit ex li grand lingues occidental. Por su projecte de un international lingue il provat utilisar ti ja existent international vocabularium tam plenmen quam possibil, ma sin in li altri látere transprender li ínregularitás del lingues national.

Ti ci punctu esset li nov in li lingue de Wahl: It completmen assimila li international vocabularium, tal que solmen poc elementes deve ancor esser novmen aprendet e que un comprension es possibil presc a prim vise. Ma in sam témpor it structura ti international vocabularium secun un sistema tam clar e facil, que anc persones, queles támen deve ancor nov aprender ti vocabularium, ne besona aprender con it anc omni ínregularitás del lingues national.

On posse regardar li lingue de Wahl quam successosi via medial, quam mediation inter li heredat international vocabularium, quel representa li cultural heredage europan, e un simplic e regulari lingual structura, quel dá a omnes, ne nur a europanes, li possibilitá posser utilisar li lingue ja pos curt témpor.

Pos li Duesim Guerre Muindal li nómine del lingue, «Occidental», devenit un obstacul por su usada in li landes comunistic. On suposit contra-revolutionari tendenties pos su utilisation. Ma it es self-comprensibil, que un lingue self es liber de ideologie. Chascun posse utilisar e mis-utilisar it por chascun ideologie. Por preventer li prejudicies in li ost-europan landes, on tande decidet nominar li lingue «Interlingue».

Un duesim motivation por li election del nov nómine esset li facte, que li International Auxiliary Language Association (IALA) self conceptet un nov Lingue International, li nómine de quel esset «Interlingua». Por evitar nov dissectiones a diversi fractiones in li Movement Mundlingual, on provat aproximar a unaltru li du lingue-projectes, queles ya esset tre simil.

Ma in facte un fusion del du lingue ne evenit. Li basic diferentie inter ambi es li facte, que IALA-Interlingua, altri quam Interlingue-Occidental, in su essentie es conceptionat quam summa del elementes comun inter li lingues sud-romanic (Portuguesi, Hispan, Italian), ma ne oferta un metode a un plu profund structurisation, quel vell far possibil a homes, queles parla null de ti lingues, rapid e bon aprender it.

IALA-Interlingua es dunc un interessant modelle del coses comun ínter li sud-romanic lingues. Interlingue-Occidental in contrari es un lingue «pan-europan». Ma proque hodie li «europan cultura» (almen sur li campe del lingue) essentialmen representa li «international cultura» (sin despreciar per to altri culturas!), Interlingue-Occidental es li «international lingue».

Alfabete e pronunciation

Alfabete

A (a), B (be), C (ce), D (de), E (e), F (ef), G (ge), H (ha), I (i), J (jot), K (ka), L (el), M (em), N (en), O (o), P (pe), Q (qu), R (er), S (es), T (te), U (u), V (ve), W (duplic ve), X (ix), Y (ypsilon), Z (zet)

Pronunciation

Vocales quam in german, italian, hispan etc.

• y quam vocal = sved y, german ü, francés u;
• y quam consonant = y anglés, hispan;
• c ante e, i, y = ts, in omni altri casus = k;
• g ante e, i, y = j francés, in altri casus quam g german;
• h aspirant quam in anglés, german;
• q quam in german e anglés;
• s quam in francés;
• v quam in anglés e romanic;
• x = ks;
• z = ds;
• ch quam in anglés e hispan;
• eu quam in francés;

Grammatica

Pronómines personal

			masc.	fem.	n.				mas.	fem.
Subject	yo	tu	il	illa	it	noi	vu	ili	illos	illas
Object	me	te	li	la	it	nos	vos	les	los	las

Pronómines relativ

Li pronómine general es quel, anc por li accusative.

Li mann, quel es ci. Li mann, quel yo vide.

Por li persones specialmen on usa qui.

Qui ha venit?

De quel li accusative es quem.

Possessives

Pronómines	mei	tui	sui	nostri	vestri	lor
Adjectives	mi	tu	su	nor	vor	lor

Demonstratives

• ti, a quel on adjunte, si necessi, li adverbie ci por li coses proxim o ta por li coses lontan:

ti mann, ti-ci fémina, ti-ta infant.

• Quande on vole insister sur li qualitá, on usa tal, quel es li correlative de qual.

qual patre, tal filio.

Numerales

• 0 null, 1 un, 2 du, 3 tri, 4 qua(d)r, 5 quin, 6 six, 7 set, 8 ott, 9 nin, 10 deci, 11 úndeci o deci-un,
• 12 dúdeci o deci-du, etc. 20 duant, 30 triant etc. 100 cent, 500 quincent, 1000 mil, 1.000.000

million.

Ordinales

On adjunte li suffixe -esim al cardinales:

du-esim, set-esim, duant-esim

Multiplicatives

On adjunte -(i)plic al cardinales: tri-plic, mult-i-plic.

Fractiones

1/1 un total; 1/2 un demí; 1/3 un ters; 3/4 tri quart.

Li altri fractiones es expresset per li ordinales: 5/7 quin setesimes.

Collectives

On adjunte li suffixe -en: six-en, dec-en, cent-en.

Tabelle del correlatives

	Por interrogar	Por monstrar	Indeterminat	Negation	Null indication	Total
Qualitá	qualmen?	talmen	in alcun maniere	nequalmen	in qualcunc maniere	in omni maniere
Quantitá	quant?	tant	alquant	nequant	quantcunc	tut-men
Tempore	quande?	tande	alquande	nequande	quandecunc	sempre
Loc	u?	ta, ci	alcú	necú	úcunc	partú

Verb

Li tema presentic es format per adjunter un del tri vocales (a, i, e) al tema verbal (radica plus prefixes e sufixes). Tivocal es caracteristic por chascun verb e resta ínvariabil in omni formes del conjugation.

• Tema verbal: fabric, exped, construct
• Tema presentic: fabrica, expedi, constructe
• Li infinitive es format per adjunter -r altema presentic: fabricar, expedir, constructer
• Li presente es egal al tema presentic: yo fabrica, tu expedi, il constructe
  • Li verb esser have un special abreviat formdel presente: es, vice esse, pro su grand frequentitá.
• Li participie passat (anc participie passiv) es format per adjunter -t al tema presentic: fabricat, expedit, constructet
• Li participie passat es usat anc quam passate simplic: noi fabricat, vu expedit, ili constructet
• Omni composit témpores passat esformat per li verb auxiliari har. lli indica actiones terminat.

• Passate composit: yo ha fabricat, tu ha expedit, il ha constructet
• Passate anteriori: noi hat fabricat, vu hat expedit, ili hat constructet
• Future simplic: It es format per li auxiliare va. il va fabricar, ella va expedir, on va constructer
• Future anteriori: yo va har fabricat, tu va har expedit, il va har constructet
• Conditionale simplic: It es format per li auxiliare vell: noi vell laborar, vu vell expedir, ili vell constructer
• Conditionale passat: il vell har fabricat, il vell har expedit, ili vell har constructet

Quo: What Quel: Which

Ligamines externe

• Vocabulari
• Dictionario and vocabularium: [1]
• Interlingue-Union
• Cosmoglotta
• Occidental en Kafejo.com
• Resume de gramatica de Interlingue (Occidental)
• [2][3] Lectures in Occidental.
• Li Yahoo-gruppe de Interlingue-Occidental