Kurt Neumann

Kurt Neumann esset un activist de Interlingue-movement de Germania. Il nascet li 21-im de novembre 1907 in Berlin e morit li 1-im de septembre 1981 in Dresden. Secun profession Neumann esset ingeniero e habitat in li ost de Germania in li German Democratic Republica. Il esset li representante del Interlingue-Union in li German Democratic Republica.

Neumann conosset Esperanto desde li annu 1922, ma in li annu 1925 il transfertet a Ido e devenit Idisto. In li annu 1928 Neumann definitivmen devenit un adepte de Occidental (hodie Interlingue. Neumann partiprendet in li annu 1935 li Occidental-conferentie in Bernau che Berlin in quel anc Edgar de Wahl assistet.

Durant li nationalsocialistic dictatura in Germania in li annu 1935 li german policie confiscat su omni printates pri mundlingues e li tot corespondentie de Interlingue.

Neumann editet un micri foto-bulletine con li nómine Panorama in quel il raportat pri omni evenimentes interlinguistic digni de interesse. Neumann esset anc un autor del cursu de Interlingue por german interessates. In li ultim annus de su vive il editet li Interlingue Forum folies por interlinguistica.

Kurt Neumann parlat anglesi e li russ lingue. Il anc ocupat se pri francesi e latin.

Citates

Du conosset citates de Kurt Neumann secun Cosmoglotta nó. 290 (51) in li annu 2000.

Por me self ne es de grand importantie esque on va acceptar Esperanto o Interlingue o un simil systema de un international auxiliari lingue. Ma yo have li opinion que on deve defender lu plu bon, defender to, quo on considera quam li scientic veritá.

Yo self ha selectet Edgar de Wahl quam mi mastro, yo es content pri to, quancam anc in Interlingue existe punctus queles on vell posser ameliorar. Ma in 99 percent Interlingue es un acceptabil solution.

Bibliografie

• Panorama. Folies informativ (formate A6). Dresden 1968.

Fontes

• Noi memora nor pioneros: Ing. Kurt Neumann, in: Cosmoglotta nó. 290 (51) in li annu 2000 (Ligation)