Regul de Wahl

Li regul de Wahl es un regul de parolformation, developat de linguist Edgar de Wahl e aplicat in lingue artifical Interlingue (nominat anc "Occidental") creat de il. It servi a creation de cert formes grammatical ex altris (por exemple substantives ex verbes).

Regul

Infinitives ex verbes in Interlingue have maxim frequentmen li desinenties -ar o -er. Mult paroles es derivat ex li tema perfectic de verbes per adjuntion de suffixes. Li tema perfectic de un verbe es recivet in sequent maniere per li Regul de Wahl:

Si, pos deletion de -r ex li infinitive con li finales -ar e -ir, o pos deletion de -er ex li infinitives con li finale -er, li radica termina se per vocale, on adjunte -t: crea/r, crea/t-, crea/t/or; expedi/r, expedi/t-, expedi/t/ion; contribu/er, contribu-, contribu/t/ion
Si li consonante final del radica de un verbe con li finale -er es d o r, on altera it a s: decid/er, deci/s-, deci/s/ion; curr/er, cur/s-, cur/s/or
In casus restant, con six exceptiones, li deletion del desinentie da li radica exiget: duct/er, duct-, duct/ion; adopt/er, adopt-, adopt/ion;

Li six exceptiones es:

ced/er, cess-
sed/er, sess-
mov/er, mot-
ten/er, tent-
vert/er, vers-
veni/r, vent-

e li verbes format ex ili per prefixes.

Pro to que li regul composi se ex tri partes, it es frequentmen nominat quam "tri regules de Wahl".

On crea li verbes ex substantives e ex adjectives, eliminante li desinenties e recivente li radica. Pos li adjunter -r o -er, on recive infinitive in pluparte de casus: decora/t/ion, decora/t-, decora/r.

Aplication

Ti regul es aplicat in li lingue Interlingue-Occidental u li suffixes -ion, -iv, -or, -ori, (-or-ia), -ura e quelc vez anc -bil es adjuntet al tema perfectic quem es trovat secun li Regul de Wahl. Pos possibil modificationes on posse aplicar ti regul a creation de nov formes ex vocabules particularimen in li lingues romanic o in ili queles prunta vocabularium ex lingues romanic.

Referenties

(en) Henry Jacob, Occidental (1922) by Edgar de Wahl
(en) Henry Jacob, The Preparatory Work for an International Technical Terminology reprinta de The British Steelmaker, decembre 1945

v · d · m Interlingue
Lingue	Grammatica (Regul de Wahl) • Literatura • Historie (Auli • Occidental in Europa) • Salute, Jonathan!
Jurnales e revúes	Catalonia in lucta • Cosmoglotta • IE Munde
Occidentalistes	Edgar de Wahl • Alphonse Matejka • Ric Berger • Ilmari Federn • Vicente Costalago • Karl Janotta • Adrian J. Pilgrim • Joseph Gär • A.Z. Ramstedt • Engelbert Pigal • Hermann Alfred Tanner • Occidentalistes
Associationes por Occidental‎	Association por International Servicie • Comité Explorativ por li Lingue International Auxiliari • FEDERALI • Hispan Association por Occidental • Interimari Academie • Interlingue-Union • Occidental-Kerho • Occidental Societé de Francia • Occidental-Academie • Occidental-Presse • Sved Occidental-Federation • Sviss Association por Occidental‎
Listes	Dictionariums • Jurnales e bulletines • Bibliografie